Merry Christmas！

祝大家聖誕快樂！我地買左份聖誕禮物俾屋企孖寶，睇下佢地有幾愛就知啦！ 爆機雪 + DJ Jack

平安夜，產假的第一天

終於開始我的第一日產假，又係24號平安夜，去完睇醫生，就同SamSam去左又一城Taste買左Ｄ野食入Sam家燒烤，係Taste串來插去，好辛苦咁買齊要的物品，等齊兩位老細齊齊BBQ，等到８點幾Dom少出現，話咁快就透起爐，開始BBQ，Ｄ野食又正，不知不覺燒到兩點幾三點，大家有Ｄ累，返到屋企整埋對孖寶，係四點幾終於有得瞓，雖然今年無去尖沙咀倒數，但係就非常滿足。

Dom少真偉大

今日Dom少好偉大咁幫小Dom砌好張BB床，大家都好辛苦咁將Ｄ野執完又執，終於都整到七七八八，果然係做爸爸的偉大，平時要執屋都無人理，今次為左ＢＢ真係勞心勞力，亳無怨言，而且佢又錫住我，唔駛做，真係要講聲 “多謝老公”!

發悶的小Jack

小Jack今晚同醫生有個約會，就係一年一度打針日。佢去到診所等左好耐....好耐，見到隻貓都好無耐，唯有你眼望我眼互望對方。打完針後，佢飛快咁返回佢地頭---花虛，又開始作威作福，先聲奪人的生活。

小Dom的第37週

眨眼小Dom今日終於踏入37週，即係話小Dom足週數之餘，佢會隨時準備出世。而家的心情都係一般啦，唔敢太興奮，但係又有Ｄ期待。今日我同Dom少總共收到3份送俾小Dom的禮物，多謝晒朋友們!

又驚又喜的一天

今朝一早去左睇醫生，今次唔係梁醫生，可能依個關係，第二個醫生為左安全就叫我過醫院果邊check BB心律是否正常，如果唔OK就要留院，真係嚇到我面都白晒，因為入醫院對我黎講係一個大敵，好彩聽完半個鐘一切都正常，走得！就係咁醫院就收左我$150的所為入院＋住院費，唔係掛，我無住過都要收$，就當破財擋災啦。不過有樣開心的就係...仲有3日小Dom就足37週，即係話佢唔屬於早產B，我就放心晒了!

好慘呀，失眠呀

由星期日開始我有Ｄ失眠的跡象，唔知係咪因為越黎越接近小Dom出世的關係，有Ｄ緊張。係前個9個月我都可以好冷靜，keep得自己的心情好好，但係唔知點解係依個星期有Ｄ改變，開始憂慮要入醫院，因為依個地方令到我好陌生，好怕。我好努力將依種情緒收起，但都敵不過我身邊的人，包括Dom少同公司人，我唔想令到我身邊的人擔心，我知道我要儲足精神迎接小Dom。

倒數小Dom一個月

今日係小Dom出世倒數一個月的第一天，我就選擇左去睇醫生。醫生話BB都達標，但我就覺得差少少，因為上次有B+,今次只有B-，可能近排工作有Ｄ忙，除左正常工作外，我仲要預備一Ｄ我放產假時要做的安排，我想就算放假都可以keep住班小朋友。今次醫生話我知小Dom有2423gm，嘩！原來我已經日日陀住5磅幾的人仔週圍走，不過我都感到好自在。

聖誕燈飾（二）

今日係尖沙咀睇完醫生，順道去行下，原來四週都充滿聖誕購物潮，不論係咩鋪頭，都見到人來人往，對於我依個大肚婆黎講真係有Ｄ難道，或者係挑戰自己的耐力，但係到最後都要休息，雖然如此，但我地都係海運同海旁影左Ｄ相，都算「到此一遊」呀!

聖誕燈飾(一)

今晚係我今年第一次睇燈飾，朗豪坊今年做左個白色公園，內藏好多白色動物。今晚係陪我一個由毛里求斯返黎的姪女一齊去，睇落去似我朋友多個親戚，話咁快都廿歲，時間過得真係快，攪到我突然覺得....又長大了。

夜半怪傑

話說尋晚我地全家正在睡夢中的時候，我同Dom少都聽到床下底傳來一陣怪聲，唔通有......，唯有伸個頭去睇下，啊！原來係...小Jack夜半歌聲，擾人清夢。話雖如此，可能佢發緊歌星夢，不過我諗佢苦練多一段日子先可以出碟了。

亞Jack小基地

我地的小寶亞Jack終於搵到佢既基地了。話說我地換左張床之後，佢發現到背後同下面有一個可以容納佢的小洞，從此就成為佢的避難所，同雪雪追逐時佢就會跑入去，因為佢知道家姐唔夠佢體型小，除此之外，依個小洞仲係佢同周公公約會的好地坊，出入自由，無人阻擋，簡直係佢的小天堂。

上堂了！

今日同Dom少一齊去上了，當然係為左小Dom啦，因為要一齊迎接小Dom的來臨，我地就要一齊聽左3個鐘頭。其實內容都大同小異，睇Ｄ雜誌都會略知一二，其實我地最終目的都係為左...Dom少可以入黎陪我分娩，嘻嘻！

Ho Yin Wedding

恭喜！恭喜！亞哥終於成家立室了。之前同佢預備的都得到，睇到佢地結婚都有少少感動，令我回憶起自己４年前結婚的情況，眨眼自己原來都結左婚4年，時間過得真係快，但係到左一月我地仲榮升爸爸媽媽，到時一定好熱鬧了。

忙碌的一週

終於忙完了，幫亞哥整的結婚佈置都可算是完滿，希望佢地喜歡。係到預先祝佢地...白頭偕老，永結同心！

31週的小Dom重......

踏入31週了，今日去睇醫生，醫生話小Dom一齊都好好，基本上全部都達到標準，係醫生的角度係俾左個幾意外的結果佢地，因為大家都擔心我的負荷，怎料小Dom都好爭氣，健康成長，而且又唔會令到我覺得好辛苦。今日醫生話我知佢已經有1.8kg，都非常理想，只要keep住依個進度，相信小Dom會健康咁出黎見大家。

神祕的小Dom

等左依日好耐了，小Dom已經27週多Ｄ，今日我地約左醫生照4D，真係有Ｄ緊張，唔知小Dom係咩樣呢?去到醫生到等左大半個鐘先有得睇，連小Dom都話悶到瞓左。個醫生都幾細心，幫我check下小Dom每一部份。嘩！見到了...小Dom神神秘秘用雙手遮住，只係俾七分面人地睇，好彩到最後都睇到個樣，真係好期待佢的來臨。有緣的朋友見到面就俾張相你睇下啦，因為我地都尊重小Dom俾返Ｄ私隱佢。^o^

好回味呀...

好耐都無食過雪糕啦，今日終於忍唔住經過麻布茶房食左一個我好愛的雪糕山，就係紅莓＋藍莓＋軟雪糕，真係...正!正!正!

小Dom的第一踢

原來胎動是有一種莫明其妙的感覺，就好似有Ｄ野係你個肚裡面郁郁下咁，當初唔知仲以為個肚做咩事。其實早在我生日前一日就有依一種感覺，或者小Dom想送份生日禮物俾我，我都唔知.....直至到前幾日係網上睇到人地話胎動的感覺時，我先至肯定。唔緊要啦，我會好好享受依一個過程。

新玩意

尋日同Dom少去完超級市場，順道經過百老匯走去八下，點知俾我八到部正野，心郁郁想買定用黎等小Dom出世，個售貨員服務態度都唔錯，就係咁...我地就決定「買」。但最可惜就係無貨，不過皇天不負有心人，第二日就班到一部返黎，果然個售貨員員好有信用，第二日就買到部機，效果唔錯，我地會用熟部機等小Dom出世了。睇下張相影得都唔錯呀!

盡情的一天

好開心呀，今日同Dom少入機場玩左一日，入到機場第一時間食個只有機場先有得食的Burger King，雖然比M記貴左Ｄ，但係有品質保証。食過飽飽之後我地就出發去２號大樓的翔天廊睇４Ｄ電影﹣﹣「白馬奇緣」，效果唔錯但睇得１４分鐘。之後我地去左做飛機司，睇飛機，最後我地行到一間玩game的地方，玩左個幾鐘，仲同小Dom一齊打乒乓球、射龍門、賽車.....簡直勁，相信第二時小Dom一定係一個活躍份子，哈哈！

沒有冷氣的日子

救命呀！已經過左一個星期無冷氣週，快Ｄ安裝部新冷氣就好了。話雖如此，依一個星期俾左我地一家好大的考驗，就係---「耐性」，結果當然個個都通過啦，尤其是兩隻披住厚毛的活寶貝，能夠同我地同甘共苦，抵鍚！

The sex of little Dom is ........

今日心情有少少緊張，因為Dom少第一次陪我睇小Dom, 唔知佢今次乖唔乖呢？當我地入到去見醫生時，醫生同我地傾完一大輪之後就開始照，我以前睇過當然好快就get到醫生的意思，但Dom 少就好似追星咁左擰右擰，但小Dom都好合作俾我地睇足全程。當醫生照到手仔時，小Dom一隻提高一隻收係耳仔邊，Dom少就話睇唔清，小Dom即刻伸出隻手give me five同Dom少say Hi,so funny!之後醫生就照到BB的性別，對我地來說男女我都愛，但對Dom少黎講....而家就有多個籍口俾佢買玩具，留番第二時同小Dom一齊玩「變形金剛」

帕布回港

今日一早起身就話打1號風球原來係前兩日打唔成的帕布，個肚又有Ｄ痛，本來諗過唔返工，但最後都無咩事，當然照常返工，到左中午食飯就變左３號仔，安頓好班仔唔駛兩個鐘就話8號，返到屋企無咩好做，陪左對孖寶一陣Dom少就返，可能悶得很，同Dom少睇左齣7:30，睇完出黎又話回返3號仔，你話依個風係咪因為想達成香港人的心願，明明走左都返黎同你say bye呢！

小Dom 已4個月了

時間真係過得快，眨眼已經四個月，係依四個月我諗係我咁多年來最健康，因為每日都有兩杯奶，一支乳駱同蛋，我由原來的22吋腰變成27吋腰，簡直自己都有Ｄ唔係咁相信，雖然如此，但我知道Ｄ營養俾晒亞Ｂ，我仲好輕盈架，健步如飛，大家放心，我會小心，願小Dom繼續係我肚內健康成長。^o^

2007動漫節

今年動漫節係27/7至31/7舉行，當然Dom少都有份參與，而佢今年的作品是銀魔，我地事前都做左好多功課，又去睇戲又去影相，效果就等大家欣賞下。話說今年是歷年來最多人一次，我都見到人山人海，仲要開到11:30p.m.都咪話唔辛苦，好在搵到個唔駛擔心嘅好幫手，我就唔駛咁操勞。因為台灣有好多貨sold out，所以係動漫節只有Monster Bomb同Q.Q. Bomb賣，反應都唔錯，不過唔知點解D人都係咁鍾意問：「依個咩黎家？有咩用？」明明好大個匙扣...真無解??

Happy Birthday to Suet Suet

今日係我寶貝女雪雪的５歲生日，雖然今年無同佢開生日會，但係佢都好開心，一早起身就同你say morning之後就同你講要依樣果樣獎賞，仲有一餐豐富晚餐就係﹣﹣鮮雞肉＋菜＋糧，甜品係乳酪，正！最緊要的梗係有得落街散步啦！返到屋企發個美夢就very good la !

小Dom的第14週

眨眼小Dom已１４週，去睇醫生，嘩！原來有15cm長，手仔腳仔都好長，有Ｄ似我，見到佢手腳大動，我真係好開心，快Ｄ見到佢就好了!

2007台灣玩具創作大展

Dom少終於從台灣返左黎了，雖然手信唔多，但知道今次反應都唔錯，有Ｄ仲sold out.今次個booth的design我都有份參與，效果都唔錯，不妨大家俾D意見。放心，出年我一定會親身自己再去玩一次，因為好掛住台灣Ｄ野食呀！

I am having a little Dom

Hi各方好友，今日我終於可以正式宣佈 ﹣﹣我有了小Dom三個月了( I have little Dom three months),好想同大家分享我依份復活節禮物好耐，大家係咪會好意外呢，見我仲行得、走得、跑得又跳得，唔使擔心，我會識得好好愛錫自己同小Dom。有樣嘢好得意，每當我食完嘢之後個肚就會好快咁賬起，可以想像到第二時大住個肚會係點嘅樣，真神奇，嘻嘻！雖然今日Dom少係台灣，希望佢仲記得啦，貴人擅忘嘛。

人的真面目

原來人真的好恐怖，無論同你有幾親幾好的人可能到最後都係一樣『自私』。我今日又一次感受到咩嘢叫做“打完齋唔要和尚”、“過橋抽板”、“過左海就係神仙”、俾人嫌你阻住晒的真諦，原來付出同收獲是不能成正比....真失望 ！

繁忙的自由人

今日一起身就等收件，好彩早上已經收到批“炸彈”仲趕得切寄DHL，原來DHL的效率真係好快，依頭落order，10分鐘就到，勁！跟住就即刻返工，有如依個接力賽，放左工先知道咩嘢叫做放下心頭大石，好累了，都係早Ｄ瞓返覺好的。

自由人

今天是我自由人五天行的第一天，要好好享受一下我的free time。因為Dom少出左trip去台灣，希望佢一切順利，搵返Ｄ奶粉錢。真係掛住Ｄ涮涮鍋呀！

活潑的小Dom

幸運地今日俾我book到一個專為BB檢查的醫生。唔知係咪等到悶得制，由４點等到５點幾先睇第一次，點知一照...小Dom用個背脊擋住唔想見人，攪到我又要等多個幾鐘，到第二次唔知係咪佢又悶得很，又唔肯瞓低，醫生話如果等多陣再照唔到就要再約另一日，可能小Dom唔想再黎睇依個醫生，佢就乖乖地就犯，俾醫生檢查，睇到佢有手指仔，好活躍，長左３cm。今次醫生抽左血，同佢度頸皮，都係睇左１５分鐘，我為左依１５分鐘就要等３個幾鐘，破左有史以來睇醫生等得最耐時間紀錄，掂呀！

小朋友的關心

當小朋友知道我有了小Dom，大家都好好奇，記得今日我著件衫短左少少，露出個小肚仔出黎，係中心行出行入的時候，發現有數對小妹妹的眼睛望住我個肚眼都唔眨，茶點過後，佢地忍唔住走過黎問；「姑娘，點解你個肚突左出黎？」，我話：「係呀，有個小生命係裏面。」，過了一會，有四、五個小妹妹走到我面前一輪咀同我講：「姑娘，有ＢＢ唔可以飲檸檬茶，唔可以食公仔麵，唔可以著褲，要著裙，唔可以畜皮帶，唔可以著高踭鞋......」我笑住同佢地講：「多謝你地嘅關心，我知道了。」但係我心裏想：「依次弊了，身邊原來咁多偵察機，無得偷食添！」。雖然如此，但我心裏都覺得好warm，我相信小Dom都會感受到有咁多哥哥姐姐的關心！

小朋友的天真

中心的小朋友知道我有了小Dom，可愛的是....原來小朋友也會為我開心、緊張同期待。係依兩日有小朋友問我：「姑娘，你幾時咩？」我即問他：「咩呀？你係咪想問我幾時生BB呢？」，他立即驚訝地說：「姑娘，做咩你講出黎𠺢，唔可以咁大聲。」我問他：「為什麼？」，他回答說：「唔可以俾人知𠺢！」我說：「咁你又問？」，他即用他的傻笑本色回應，當然到最後我都有回答他的問題。突然令我想起小朋友的可愛便是 ﹣﹣﹣『天真』

天賜恩物

尋晚真係瞓唔着，因為瞓着都笑醒．尋晚同Dom少一齊計下，願來小Dom係天主送給我們的復活節禮物，Thanks God! 我相信佢能帶俾我地一家人歡欣，我會好好照顧佢，令佢健康快樂地成長，話時話，唔知佢有無機會成為08年第一個BB呢，真期待^o^

小Dom好活躍呀

好緊張呀，今日第一次去醫生到睇小Dom，唔知係點呢....等左成個鐘，終於到我了。當我照超聲波時...就好似睇緊小學教科書一樣，見到小Dom的外形，有頭仔、身仔、小手仔同小腳仔，好感動，好奇妙，原來佢依家有9星期6日，只得3cm左右，當醫生係我肚上停落黎等我睇得清楚Ｄ時，我見到小Dom的頭、手有微微動，果一刻簡直令我感受到BB的存在，開心到彈起，amazing！下一次Dom少能同我一齊見證就最prefact.

Good Song --- My love will get you home

My love will get you home

If you wander off too far
My love will get you home
If you follow the wrong star
My love will get you home
If you ever find yourself
Lost and all alone
Get back on your feet and think of me
My love will get you home Boy
My love will get you home

If the bright lights blinds your eyes
My love will get you home
If your troubles break your stride
My love will get you home
If you ever find yourself
Lost and all alone
Get back on your feet and think of me
My love will get you home Boy
My love will get you home

If you ever feel ashame
My love will get you home
If its only you to blame
My love will get you home
If you ever find yourself
Lost and all alone
Get back on your feet and think of me
My love will get you home Boy
My love will get you home

重大發現......有了小Dom

今日終於決定check下身體，點知發現......有了小Dom，令我既興奮又緊張，真的無諗過考完試第二日又有一大驚喜，希望小Dom健健康康！