小Dom滿月了

有名有份的“晞晞”

我同Dom的結晶品除左面世之外，終於都攞左出世紙決定到佢個字號叫“國晞”，英文名叫“Max”(Maximilian)是主教的一個聖人，解最偉大的，連埋個姓一齊讀就係叫Maxshi，即係法文“多謝”，我好多謝天主俾左一份咁偉大的禮物俾我地，我地會好好培育佢。而中文名就係希望佢能夠做一個頂天立地而帶有希望的人，使佢人生更精彩。

小Dom回家了

我地終於可以一家團聚了！

忙碌的開始

雖然小Dom仲係醫院，唔好以為可以好輕鬆，係佢住院期間，我每日就來回屋企醫院三轉，見醫生、餵奶同罰企，因為探BB時唔準摸唔準抱，只可以企係睇住個B一個鐘；而Dom少就每日六點鐘準時放工，然後飛的來睇小Dom，今個月我地大部份的開資就係交通﹣﹣﹣的士

我出院了

本來尋日可以出院，但因為天氣太冰凍的關係，係醫院住多日先出院。今日只有我出院，小Dom仲要留院休息，自我懂事以來今次係我第一次住醫院。起初我覺得醫院係一個幾可怕的地坊，又無得外出，俾人監視，好似一個監獄咁，但經過今次五日四夜的生仔旅程後，我對醫院有Ｄ改觀，原來Ｄ姑娘都好好人，都幾有親切感，而且Ｄ工友都照顧得好周到，又有人安排你的一日三餐＋宵夜，你只要得閒隔幾個鐘俾護士量下血壓，問下問題就得，有如旅行一樣，好彩今次係同房識左幾個朋友仔，都可算係大有收穫，原來住醫院都唔係咁可怕。

難忘的元旦2008

Happy New Year ! 今年係一個好特別的元旦，因為係醫院度過， 而且仲有一個新成員小Dom的出世，唔知係咪佢仲差一個鐘就十二點，條氣有Ｄ唔順，要係箱仔觀察，真係擔心死人了，所以今年的新年願望就係...祝願大家身體健康！小Dom強強壯壯！

小Dom出來了！

今日瞓到半夜三點幾，感到有Ｄ肚痛，原來依Ｄ叫“陣痛”，終於忍唔住七點幾返到醫院，經醫生檢查後，話今日可以生，我即刻嚇左一跳，雖然有心理準備，但實在有Ｄ緊張...就係咁大概十點就俾人推左去候產房。最初我都忍得痛，但到左十二點幾俾醫生篤穿水之後，痛就漸漸強烈，只係開得兩度，到左四點幾開到四度，終於忍唔住吸止痛劑同打針，係昏昏迷迷的狀態下，等到八點醫生話都係開到六度，再過多半個鐘，醫生突然話開到九度，護士就立即通知係產房外等候多時的Dom少入產房陪我生仔。我用左個多小時，係Dom少同我一齊見證下，係11:03p.m.小Dom出世了，重2.43kg，佢第一眼望望Dom少，再望下我，同我地一齊過元旦。我開心感動之餘又覺得好累，依個痛與愛的經歷，真正令我畢生難忘！

作好最後準備

返到屋企，當然要為迎接小Dom的來臨作出最後同最好的準備啦。除左安排物品之外，仲要安排家中兩寶的問題，小Jack要係聽日去petshop，而雪雪就留在家中陪Dom少，有待BB出世之後再送去宿營，希望兩個都可以習慣宿營生活啦！

Home Leave

返工有sick leave,醫院有home leave. 因為我尋晚一路都keep得住Ｄ血壓，醫生話可以唔駛咁快催生，可以俾兩日home leave我，但醫生話BB size 雖然細左Ｄ，但配合返我的身形其實都ok，對我黎講Ｂ大未必一定好，因為怕難出，所以都會建議我下星期生。唔知係咪小Dom知道依個問題，定係佢想做元旦仔的關係，今日一早俾我見紅，令到我有Ｄ慌亂，但又有Ｄ驚喜，因為有機會可以唔駛催生嘛。

入院的第一天

今朝一早起身，本應到醫院例行檢查就可以返屋企，點知知醫生話我的下壓較高而且週數又足，不如就入院催生啦，聽完嚇到我面都青。好彩廣華Ｄ助產士同護士長都好好，見我一個人入院，都黎安慰我，又俾間雙人房我住，直到Dom少同亞媽黎睇我，就放鬆左Ｄ，直至晚黑Ｄ血壓就回復正常。其實成晚我都瞓唔到，除左有Ｄ驚之外，再加上Ｄ人會行來行去，眼瞓死我了!

美味小Jack

點解小Jack會變左依個樣？佢唔係食左酸梅，而係食左佢嘅至愛---『麵包』，好味到黏黏脷！>_<

Merry Christmas！

祝大家聖誕快樂！我地買左份聖誕禮物俾屋企孖寶，睇下佢地有幾愛就知啦！ 爆機雪 + DJ Jack

平安夜，產假的第一天

終於開始我的第一日產假，又係24號平安夜，去完睇醫生，就同SamSam去左又一城Taste買左Ｄ野食入Sam家燒烤，係Taste串來插去，好辛苦咁買齊要的物品，等齊兩位老細齊齊BBQ，等到８點幾Dom少出現，話咁快就透起爐，開始BBQ，Ｄ野食又正，不知不覺燒到兩點幾三點，大家有Ｄ累，返到屋企整埋對孖寶，係四點幾終於有得瞓，雖然今年無去尖沙咀倒數，但係就非常滿足。

Dom少真偉大

今日Dom少好偉大咁幫小Dom砌好張BB床，大家都好辛苦咁將Ｄ野執完又執，終於都整到七七八八，果然係做爸爸的偉大，平時要執屋都無人理，今次為左ＢＢ真係勞心勞力，亳無怨言，而且佢又錫住我，唔駛做，真係要講聲 “多謝老公”!

發悶的小Jack

小Jack今晚同醫生有個約會，就係一年一度打針日。佢去到診所等左好耐....好耐，見到隻貓都好無耐，唯有你眼望我眼互望對方。打完針後，佢飛快咁返回佢地頭---花虛，又開始作威作福，先聲奪人的生活。

小Dom的第37週

眨眼小Dom今日終於踏入37週，即係話小Dom足週數之餘，佢會隨時準備出世。而家的心情都係一般啦，唔敢太興奮，但係又有Ｄ期待。今日我同Dom少總共收到3份送俾小Dom的禮物，多謝晒朋友們!

又驚又喜的一天

今朝一早去左睇醫生，今次唔係梁醫生，可能依個關係，第二個醫生為左安全就叫我過醫院果邊check BB心律是否正常，如果唔OK就要留院，真係嚇到我面都白晒，因為入醫院對我黎講係一個大敵，好彩聽完半個鐘一切都正常，走得！就係咁醫院就收左我$150的所為入院＋住院費，唔係掛，我無住過都要收$，就當破財擋災啦。不過有樣開心的就係...仲有3日小Dom就足37週，即係話佢唔屬於早產B，我就放心晒了!

好慘呀，失眠呀

由星期日開始我有Ｄ失眠的跡象，唔知係咪因為越黎越接近小Dom出世的關係，有Ｄ緊張。係前個9個月我都可以好冷靜，keep得自己的心情好好，但係唔知點解係依個星期有Ｄ改變，開始憂慮要入醫院，因為依個地方令到我好陌生，好怕。我好努力將依種情緒收起，但都敵不過我身邊的人，包括Dom少同公司人，我唔想令到我身邊的人擔心，我知道我要儲足精神迎接小Dom。

倒數小Dom一個月

今日係小Dom出世倒數一個月的第一天，我就選擇左去睇醫生。醫生話BB都達標，但我就覺得差少少，因為上次有B+,今次只有B-，可能近排工作有Ｄ忙，除左正常工作外，我仲要預備一Ｄ我放產假時要做的安排，我想就算放假都可以keep住班小朋友。今次醫生話我知小Dom有2423gm，嘩！原來我已經日日陀住5磅幾的人仔週圍走，不過我都感到好自在。

聖誕燈飾（二）

今日係尖沙咀睇完醫生，順道去行下，原來四週都充滿聖誕購物潮，不論係咩鋪頭，都見到人來人往，對於我依個大肚婆黎講真係有Ｄ難道，或者係挑戰自己的耐力，但係到最後都要休息，雖然如此，但我地都係海運同海旁影左Ｄ相，都算「到此一遊」呀!

聖誕燈飾(一)

今晚係我今年第一次睇燈飾，朗豪坊今年做左個白色公園，內藏好多白色動物。今晚係陪我一個由毛里求斯返黎的姪女一齊去，睇落去似我朋友多個親戚，話咁快都廿歲，時間過得真係快，攪到我突然覺得....又長大了。

夜半怪傑

話說尋晚我地全家正在睡夢中的時候，我同Dom少都聽到床下底傳來一陣怪聲，唔通有......，唯有伸個頭去睇下，啊！原來係...小Jack夜半歌聲，擾人清夢。話雖如此，可能佢發緊歌星夢，不過我諗佢苦練多一段日子先可以出碟了。

亞Jack小基地

我地的小寶亞Jack終於搵到佢既基地了。話說我地換左張床之後，佢發現到背後同下面有一個可以容納佢的小洞，從此就成為佢的避難所，同雪雪追逐時佢就會跑入去，因為佢知道家姐唔夠佢體型小，除此之外，依個小洞仲係佢同周公公約會的好地坊，出入自由，無人阻擋，簡直係佢的小天堂。

上堂了！

今日同Dom少一齊去上了，當然係為左小Dom啦，因為要一齊迎接小Dom的來臨，我地就要一齊聽左3個鐘頭。其實內容都大同小異，睇Ｄ雜誌都會略知一二，其實我地最終目的都係為左...Dom少可以入黎陪我分娩，嘻嘻！

Ho Yin Wedding

恭喜！恭喜！亞哥終於成家立室了。之前同佢預備的都得到，睇到佢地結婚都有少少感動，令我回憶起自己４年前結婚的情況，眨眼自己原來都結左婚4年，時間過得真係快，但係到左一月我地仲榮升爸爸媽媽，到時一定好熱鬧了。

忙碌的一週

終於忙完了，幫亞哥整的結婚佈置都可算是完滿，希望佢地喜歡。係到預先祝佢地...白頭偕老，永結同心！

31週的小Dom重......

踏入31週了，今日去睇醫生，醫生話小Dom一齊都好好，基本上全部都達到標準，係醫生的角度係俾左個幾意外的結果佢地，因為大家都擔心我的負荷，怎料小Dom都好爭氣，健康成長，而且又唔會令到我覺得好辛苦。今日醫生話我知佢已經有1.8kg，都非常理想，只要keep住依個進度，相信小Dom會健康咁出黎見大家。

神祕的小Dom

等左依日好耐了，小Dom已經27週多Ｄ，今日我地約左醫生照4D，真係有Ｄ緊張，唔知小Dom係咩樣呢?去到醫生到等左大半個鐘先有得睇，連小Dom都話悶到瞓左。個醫生都幾細心，幫我check下小Dom每一部份。嘩！見到了...小Dom神神秘秘用雙手遮住，只係俾七分面人地睇，好彩到最後都睇到個樣，真係好期待佢的來臨。有緣的朋友見到面就俾張相你睇下啦，因為我地都尊重小Dom俾返Ｄ私隱佢。^o^

好回味呀...

好耐都無食過雪糕啦，今日終於忍唔住經過麻布茶房食左一個我好愛的雪糕山，就係紅莓＋藍莓＋軟雪糕，真係...正!正!正!

小Dom的第一踢

原來胎動是有一種莫明其妙的感覺，就好似有Ｄ野係你個肚裡面郁郁下咁，當初唔知仲以為個肚做咩事。其實早在我生日前一日就有依一種感覺，或者小Dom想送份生日禮物俾我，我都唔知.....直至到前幾日係網上睇到人地話胎動的感覺時，我先至肯定。唔緊要啦，我會好好享受依一個過程。

新玩意

尋日同Dom少去完超級市場，順道經過百老匯走去八下，點知俾我八到部正野，心郁郁想買定用黎等小Dom出世，個售貨員服務態度都唔錯，就係咁...我地就決定「買」。但最可惜就係無貨，不過皇天不負有心人，第二日就班到一部返黎，果然個售貨員員好有信用，第二日就買到部機，效果唔錯，我地會用熟部機等小Dom出世了。睇下張相影得都唔錯呀!

盡情的一天

好開心呀，今日同Dom少入機場玩左一日，入到機場第一時間食個只有機場先有得食的Burger King，雖然比M記貴左Ｄ，但係有品質保証。食過飽飽之後我地就出發去２號大樓的翔天廊睇４Ｄ電影﹣﹣「白馬奇緣」，效果唔錯但睇得１４分鐘。之後我地去左做飛機司，睇飛機，最後我地行到一間玩game的地方，玩左個幾鐘，仲同小Dom一齊打乒乓球、射龍門、賽車.....簡直勁，相信第二時小Dom一定係一個活躍份子，哈哈！

沒有冷氣的日子

救命呀！已經過左一個星期無冷氣週，快Ｄ安裝部新冷氣就好了。話雖如此，依一個星期俾左我地一家好大的考驗，就係---「耐性」，結果當然個個都通過啦，尤其是兩隻披住厚毛的活寶貝，能夠同我地同甘共苦，抵鍚！

The sex of little Dom is ........

今日心情有少少緊張，因為Dom少第一次陪我睇小Dom, 唔知佢今次乖唔乖呢？當我地入到去見醫生時，醫生同我地傾完一大輪之後就開始照，我以前睇過當然好快就get到醫生的意思，但Dom 少就好似追星咁左擰右擰，但小Dom都好合作俾我地睇足全程。當醫生照到手仔時，小Dom一隻提高一隻收係耳仔邊，Dom少就話睇唔清，小Dom即刻伸出隻手give me five同Dom少say Hi,so funny!之後醫生就照到BB的性別，對我地來說男女我都愛，但對Dom少黎講....而家就有多個籍口俾佢買玩具，留番第二時同小Dom一齊玩「變形金剛」

帕布回港

今日一早起身就話打1號風球原來係前兩日打唔成的帕布，個肚又有Ｄ痛，本來諗過唔返工，但最後都無咩事，當然照常返工，到左中午食飯就變左３號仔，安頓好班仔唔駛兩個鐘就話8號，返到屋企無咩好做，陪左對孖寶一陣Dom少就返，可能悶得很，同Dom少睇左齣7:30，睇完出黎又話回返3號仔，你話依個風係咪因為想達成香港人的心願，明明走左都返黎同你say bye呢！

小Dom 已4個月了

時間真係過得快，眨眼已經四個月，係依四個月我諗係我咁多年來最健康，因為每日都有兩杯奶，一支乳駱同蛋，我由原來的22吋腰變成27吋腰，簡直自己都有Ｄ唔係咁相信，雖然如此，但我知道Ｄ營養俾晒亞Ｂ，我仲好輕盈架，健步如飛，大家放心，我會小心，願小Dom繼續係我肚內健康成長。^o^

2007動漫節

今年動漫節係27/7至31/7舉行，當然Dom少都有份參與，而佢今年的作品是銀魔，我地事前都做左好多功課，又去睇戲又去影相，效果就等大家欣賞下。話說今年是歷年來最多人一次，我都見到人山人海，仲要開到11:30p.m.都咪話唔辛苦，好在搵到個唔駛擔心嘅好幫手，我就唔駛咁操勞。因為台灣有好多貨sold out，所以係動漫節只有Monster Bomb同Q.Q. Bomb賣，反應都唔錯，不過唔知點解D人都係咁鍾意問：「依個咩黎家？有咩用？」明明好大個匙扣...真無解??

Happy Birthday to Suet Suet

今日係我寶貝女雪雪的５歲生日，雖然今年無同佢開生日會，但係佢都好開心，一早起身就同你say morning之後就同你講要依樣果樣獎賞，仲有一餐豐富晚餐就係﹣﹣鮮雞肉＋菜＋糧，甜品係乳酪，正！最緊要的梗係有得落街散步啦！返到屋企發個美夢就very good la !

小Dom的第14週

眨眼小Dom已１４週，去睇醫生，嘩！原來有15cm長，手仔腳仔都好長，有Ｄ似我，見到佢手腳大動，我真係好開心，快Ｄ見到佢就好了!

2007台灣玩具創作大展

Dom少終於從台灣返左黎了，雖然手信唔多，但知道今次反應都唔錯，有Ｄ仲sold out.今次個booth的design我都有份參與，效果都唔錯，不妨大家俾D意見。放心，出年我一定會親身自己再去玩一次，因為好掛住台灣Ｄ野食呀！